Jam 5 | BDD | STEP | Comi tohewasawasao, hepwaila bewa wahesagohe bwaibwainidi, ma 'imi tuta mwau nata weyahina wadou ma'imi dou gwaegwae.

James 5

Tohewasawasa 'adi hemataluwa

1 Comi tohewasawasao, hepwaila bewa wahesagohe bwaibwainidi, ma 'imi tuta mwau nata weyahina wadou ma'imi dou gwaegwae. 2 Weyahina 'imi wasawasao simwahulu pwaiya, ta wete 'ami 'ale'owao ganagana si'ai pwaidiya.

3 Ta wete 'imi maneyao wanuwahidiya, 'oimiya simiyamiya ma sigala, ta maneina bewa sihepwaila 'abehega mane madou hedade wanuwahidiya, ta tuta 'ebe losaloha 'oina 'i'alasigomi, gide 'aiwe.

4 Ma 'imi tanoha 'adi topaihowao geya wahemaisa bwaibwainidi, 'oinega topaihowaedi 'idi lomugi ta 'idi dou Yehoba Tohewaiwai tauna 'ihesagoheya.

5 Ma 'imi miya bale'uwa bwebwe'ana hedade, weyahina tuta mabwaiyana ma'imi yaliyaya, 'oinega ma'ami tole bwebwe'ana, lohe'amasa 'ilobwainegomiya, gidemusa tuwa guyai baweidi. 6 Weyahina taudi todumwalu wabwa'omatanedi, nuwana walolohe'amasidi, ta geya sawasawahina ma 'oimiya sihemaisa.

Calama'i'ita weyahina

7 Coinega tasigwao, wa'alama'i'ita 'ana siga 'ida Bada 'ihilama. Gidemusa tuwa tanoha 'ana topaihowa ma'ina 'alama'i'ita 'iyamwayamwana dohi yaigalugalu 'ana tuta ma bolimana 'ana tuta ee 'ana siga 'eli'eli 'ana tuta 'oina ma hewana 'i'elidi. 8 Coinega 'omi wete gidemusa wa'alama'i'itana ma'imi 'atepatu weyahina 'i'iunamo 'ida Badaina 'ihilama.

9 Tasigwao, sahena waboi walomugi hilegomi, nata gide 'ida Bada 'ibwa'omategomi, ma tauna Toloinaina 'i'iunamo ma 'ilatuma.

10 Coinega tasigwao, wanuwatuhuyahi palopitaowedi, taudi 'ida Badaina weyahina sihepwaila. Bewa 'ebe'ita bwebwe'ana 'oimiya, weyahina palopitaowedi 'idi miya mwauwedi 'oidiyega sitoholo pa'ala. 11 Ta 'eguma taiyawedi taudi gidemusa tahesaniyedi toyaliyaya, weyahina mwauwedi 'oidiyega sitoholo pa'ala. Ma bewa wete 'aigeda 'ebe'ita Yobi 'ina 'alama'i'ita weyahina wasanapu pwaiya, 'abehega Yobiina 'ina miya mwau 'ana 'ebe losaloha 'oina 'ana 'abihetena 'ilobeya 'ida Bada 'oinega, weyahina tauna Badaina helau ta 'atemuyamuya lamuna.

12 Ma tasigwao, 'aigeda wete ginaula madouna 'oida 'abehega sahena ta'eta'wata'walulu Tamada saninega, nuwana bale'u ginaulao 'oidiyega, bo nuwana to ginaula tuwa 'oidiyega, 'eguma 'imi gwaeupaupa 'oidiyega. Ta hesi tuwa wagwae, “Cehe,” 'eguma 'imi nuwatuhu gidemusa, ta 'eguma geya, wagwae, “Geya.” Weyahina 'eguma gwae madoudi wa'inanadi, muliyetega Yehoba 'iheyatalaegomi.

13 Ta 'eguma taiya 'imiyamwau, 'ilobwaineya ma 'i'ahwanoi Yehoba 'oina. Ta 'eguma taiya ma'ina yaliyaya, nata waliyega Yehoba 'ihepwatuwe.

14 Ta 'eguma 'aigeda 'oimiyega ma'ina lohala, hekalesiya 'ana tohanugetao 'ibwauwedima, ma si'ahwanoi weyahina, ma wete holowa 'oina silagu 'ida Bada saninega. 15 Ta 'eguma ma'idi hemisa si'ahwanoi, Yehoba 'ileme tolohalaina ma 'ibwebwe'ana, ta wete 'eguma ma'ina pui, Yehoba 'inuwasamudi.

16 Coinega 'aigeda 'aigeda 'oimiya 'imi galaowedi wahepwailedi, ma weyahina wa'ahwanoi, ma 'oinega 'imi bwebwe'ana waloba. Moisa, tobwebwe'adi 'idi 'ahwanoi waiwai hedade.

17 Bewa 'aigeda 'ebe'ita 'oida, beno Ilaitiya, tauna tomota tuwa tauda gidemusa, ta 'i'ahwanoi nuwana mabwaiyana 'oinega ma 'abehega sahena 'idohidohi bolime 'etoi ma tupwana 'oidiya, eema geya 'idohi. 18 Coinega wete 'i'ahwanoi hila ta galewega dohi 'isuluma, ta 'e'ahai mabwaiyadi sibwala hila.

19 Ma tasigwao, 'eguma 'aigeda taiya 'oimiyega 'eda bwebwe'ana 'i'ebesine, ma 'eguma taiya 'owa 'iyauina 'u'ewa hila 'eda bwebwe'ana 'oina, 20 nata togalaina yaluyaluwana 'u'abiheteya 'amasega, weyahina 'ina galaina mabwaiyana sigumwala.